ရှက်စရာအထုပ်အပိုးတွေနဲ့
ဂုတ်ကျိုးအောင်ထမ်းခဲ့ရ
ဘယ်လမ်းကလျှောက်
ဘယ်တံခါးပေါက်ကိုဝင်ပြီး
ဘယ်ပလ္လင်ဘယ်လိုဆောက်ရပါ့
စိတ်ခြောက်ခြားနေခဲ့ပြီ။
အမှန်တရား အမှန်တရားနဲ့
အသံသာကြားရ
ဘယ်နားကမှန်း ငါမသိ
တုံးပိတဲ့ဖား
မြုံးမိတဲ့ ငါးပမာ
ရုန်းကြည့်တဲ့အားလည်း
နုန်းချိလို့သွားရော့ထင့်
တရားတွေပျောက်
အမှားတွေဖောက်သနဲ့
ကျားကြောက်လို့ ရှင်ကြီးကိုး
ရှင်ကြီးကျားထက်ဆိုးသည့်နှယ်
အမျိုးမျိုးကြုံ
အဆိုးမျိုးစုံခဲ့ပြီ
မနုဿဘုံပေမို့
ဒုက္ခစုံလေသလားကွယ်ရို့။
တစ်ယောက်နဲ့ အများ
တစ်ယောက်က ဓားနဲ့မိုး
အများက အရာမ၀င်တာ
အာဏာရှင်စနစ်ပဲ
ဒီအာဏာရှင်စနစ်ဆိုးကို
ငါမရှိခိုးနိုင်။
လက်နက်တကားကားနဲ့
ရက်စက်သလားမမေးနဲ့
တို့သွေးများချောင်းစီးလို့
မြောင်းကြီး မြောင်းငယ်ဖောက်ကြတယ်။
ကောက်ကျစ်ယုတ်မာတဲ့ နှလုံးယုတ်ကို
ထုံးသုတ်လို့ဖြူမတဲ့လား။
လိမ်လုံးညာလုံးတွေကို
ငါအင်မတန်မုန်းမိတယ်။
ငါအရှုံးမပေးနိုင်
စစ်အာဏာရှင် သေနတ်ကိုကြောက်လို့
ငါတို့လက်မြှောက်ရရင်
ဖောက်ပြန်သူတွေ အသက်ရှင်ပြီး
တို့နိုင်ငံ အသက်တိုလ်ိမ့်မယ်။
ကမ္ဘာမြေပေါ်က ကွယ်ပျောက်ပြီး
တို့တတွေ ငရဲရောက်လိမ့်မယ်
အရူး ငပေါက်တွေကို
ဒူးမထောက်ကြနဲ့ဟေ့
ခွပ်ဒေါင်းအလံစွဲကိုင်ပြီး
ရဲရဲကြီးရှေ့တက်ရင်
သင်းတို့တစ်တွေ သွေးပျက်မယ်
ရှေ့တက်ကြဟေ့
တစ်လက်မမျှ နောက်မဆုတ်ကြနဲ့
အဓမ္မသမား
လူရမ်းကားတွေကို
လားလားမှ လက်မမြှောက်နဲ့။
လက်နက်နဲ့လူသား
လူသားက လက်နက်ကိုအရှုံးပွဲနဲ့
ဘုံးဘုံးလဲရရင်
သမိုင်းစာမျက်နှာမှာ
အရိုင်းဒဏ်ရာတွေ ပါရော့မယ်။
အမှန်ဟာ အင်အား
အချိုဟာ ဘယ်တော့မှမခါး
အမှန်ဟာ ဘယ်တော့မှမမှား
တရားသည်သာဓါး
ကိုယ့်အားကို ကိုယ်ယုံကြည်
ဒီမိုကရေစီ တံခါးဖွင့်ရင်း
တရားနှင့် စောင့်မယ်။
တင်မိုး
No comments:
Post a Comment